Comunicados

AGABO condena os actos vandálicos da extrema dereita contra o Consulado de Venezuela en Vigo

por

A Asociación Galego Bolivariana – Hugo Chávez (AGABO) expresa o seu rexeitamento aos ataques vandálicos cometidos pola extrema dereita contra o Consulado da República Bolivariana de Venezuela na cidade de Vigo.

Segundo confirman fontes consulares a AGABO, a sede do Goberno venezolano amenceu este domingo cunha pintada na súa fachada na que se pode ler a palabra “dictador”. Ademais, estas mesmas fontes confirman que o vidro da sede consular foi golpeada e que a fechadura da porta de entrada presentaba danos. Así, estes actos contra o Consulado na Galiza foron cometidos na madrugada do sábado ao domingo 12 de xaneiro. Os feitos coincidiron ademais co atentado con cóctel molotov cometido contra a sede consular de Venezuela en Lisboa na mesma noite.

Esta agresión contra os servizos que prestan atención ao pobo venezolano no noso país son unha mostra máis das accións de odio e violencia dos grupos de extrema dereita liderados por quen nega os resultados electorais do pasado 28 de xullo de 2024. Mensaxes de odio que nos últimos días veñen de recibir amparo e difusión dos numerosos medios de comunicación dos países da OTAN.

AGABO, presente este venres 10 de xaneiro de 2025 en Caracas, na investidura de Nicolás Maduro como lexítimo presidente de Venezuela, comprobou en primeira persoa como a comunidade internacional avala os resultados do pasado 28 de xullo. Constatou ademais que os grupos enervados do fascismo non poderán reverter os avances da Revolución Bolivariana e a súa vontade de vivir en paz e de defender da súa soberanía nacional. AGABO insta o movemento galego de  solidariedade con Venezuela a ficar atentas e atentos ante posíbeis agresións nas próximas horas. A asociación lembra a responsabilidade do Goberno español a garantir a seguridade nos edificios consulares, tal e como recollen os Convenios Internacionais de Viena de 1961. Por último, AGABO exixe á Delegación do Goberno español na Galiza a cumprir coa normativa internacional como Estado receptor.

Comunicado Oficial do Capítulo Galego da Internacional Antifascista: Sobre as inxerencias estranxeiras en Venezuela e a soberanía popular

por

A poucos días da investidura do presidente Nicolás Maduro, que terá lugar o vindeiro 10 de xaneiro de 2025, O Capítulo Galego da Internacional Antifascista condena enerxicamente a constante intromisión das potencias imperialistas e outros países intervencionistas nos asuntos internos de Venezuela. Esta actitude, orquestrada por intereses económicos e xeopolíticos, constitúe unha grave violación do dereito internacional e un atropelo á soberanía dos pobos.

O principio de autodeterminación, consagrado na Carta das Nacións Unidas (artigo 1 parágrafo 2), é un piar fundamental para a convivencia pacífica entre nacións. Porén, gobernos de países do Norte Global, apoiados por poderes fácticos e medios de comunicación ao servizo de elites corporativas, emprenderon unha campaña sistemática de desestabilización contra Venezuela. Esta campaña non só procura deslexitimar os procesos democráticos dese país, senón tamén promover intereses económicos alleos que saquean os recursos naturais dos pobos do Sur Global.

Desde bloqueos económicos, sancións ilegais e ameazas de intervención militar, até o apoio explícito a figuras políticas aliñadas co ultraliberalismo e o neofascismo, as accións das potencias imperialistas xeraron sufrimento e privacións ao pobo venezolano. Estas medidas, disfrazadas de “preocupación polos dereitos humanos”, constitúen en realidade un ataque directo contra un proxecto soberano que busca avanzar cara a un modelo político e social alternativo ao ditado hexemónico.

Condenamos a hipocrisía dos países que xustifican estas accións baixo o pretexto da defensa da democracia, mentres calan fronte a violacións de dereitos humanos cometidas por réximes aliados (Israel, Arabia Saudita, Turquía,…) que serven aos seus intereses económicos. Rexeitamos tamén o papel dos medios de comunicación internacionais que manipulan a opinión pública para xustificar agresións políticas e económicas contra Venezuela.

O Capítulo Galego da Internacional Antifascista fai un chamamento aos pobos do mundo para solidarizarse co pobo venezolano e coa Revolución Bolivariana, a rexeitar a narrativa imperialista e a defender o dereito de todas as nacións a decidir libremente o seu destino, sen interferencias externas. Só mediante a loita conxunta contra o imperialismo e o  neofascismo poderase garantir un mundo verdadeiramente libre e xusto.

Finalmente, instamos os países intervencionistas a cesar decontado as súas accións de desestabilización, respectar a vontade democrática do pobo venezolano e permitir que Venezuela exerza a súa soberanía sen condicionamentos. A paz e o respecto mutuo entre as nacións son imposíbeis se os dereitos dos pobos son continuamente asoballados polos intereses duns poucos.

Basta de inxerencia imperialista!

Pola autodeterminación dos pobos e a soberanía popular!

Capítulo Galego da Internacional Antifascista

A formación deste capítulo galego conta co aval e a participación de diversas organizacións políticas e sociais, entre as que destacan AGABO, BNG, CIG, CUT, Mar de Lumes, Movemento Arredista, PCG, Partido Comunista pola República Galega, Podemos Galiza e UPG. Ademais, sumáronse tamén Asemblea Republicana de Vigo, Colectivo da Raia, ENGA, Erguer, Esquerda Unida, Fundación Galiza Sempre, Fundación Moncho Reboiras, Galiza Nova, Galiza Global-ENG, Libraría Pedreira, Mar de Lumes – Comité Galego de Solidariedade Internacionalista, MER(LIM) – Movemento Ecoloxista da Raia (Linha Imaxinaria), Unión da Mocidade Galega (UMG), Vía Galega, así como numerosos intelectuais, sindicalistas e persoas destacadas no ámbito político e cultural, entre elas Teresa Moure, Méndez Ferrín ou Xosé Luís Axeitos.

O capítulo galego da Internacional Antifascista preséntase en Compostela

por

AGABO e as entidades promotoras (AGABO, BNG, CIG, CUT, MAR DE LUMES, MOVEMENTO ARREDISTA, PCG, PCRG, PODEMOS GALIZA e UPG) presentan o capítulo galego ante os medios de comunicación, amosando o seu compromiso de unir forzas na Internacional Antifascista

Compostela, 17 de decembro de 2024.- Ana Mosquera, Presidenta da Asociación Galego Bolivariana Hugo Chávez (AGABO), acompañada do grupo promotor, presentou hoxe en Compostela o capítulo galego da Internacional Antifascista, unha nova iniciativa que busca frear o avance do fascismo e coordinar accións políticas e sociais a nivel global.

Segundo explicou Mosquera, “entendemos a Internacional Antifascista como unha rede mundial na que converxen organizacións políticas e sociais de todo o mundo con principios incompatibles co fascismo, coa finalidade de parar o seu avance e actuar de forma coordinada.”

O nacemento do capítulo galego prodúcese após a constitución da Internacional no Congreso Antifascista celebrado en Caracas o pasado 11 de setembro. A elección de Galiza non é casual: “Galiza foi pisoteada durante anos polo fascismo. Somos fillas e fillos deses feitos, un sufrimento que non queremos nin para nós nin para os demais pobos do mundo”, sinalou Mosquera.

A promotora salientou o contexto actual marcado pola concentración do poder en mans dunha nova aristocracia financeira e tecnolóxica, así como pola emerxencia de ideoloxías extremistas que utilizan discursos populistas para lexitimar réximes autoritarios e represivos. “No Estado español, vemos como desde Madrid flúe unha ideoloxía de extrema dereita que contamina o discurso político, paraliza calquera intento de cambio e culpabiliza os máis desfavorecidos, ao tempo que defende os intereses económicos dos máis poderosos”, engadiu.

A formación deste capítulo galego conta co aval e a participación de diversas organizacións políticas e sociais, entre as que destacan AGABO, BNG, CIG, CUT, Mar de Lumes, Movemento Arredista, PCG, Partido Comunista pola República Galega, Podemos Galiza e UPG. Ademais, sumáronse tamén Asemblea Republicana de Vigo, Colectivo da Raia, ENGA, Erguer, Esquerda Unida, Fundación Galiza Sempre, Fundación Moncho Reboiras, Galiza Nova, Galiza Global-ENG, Libraría Pedreira, Mar de Lumes – Comité Galego de Solidariedade Internacionalista, MER(LIM) – Movemento Ecoloxista da Raia (Linha Imaxinaria), Unión da Mocidade Galega (UMG), Vía Galega, así como numerosos intelectuais, sindicalistas e persoas destacadas no ámbito político e cultural, entre elas Teresa Moure, Méndez Ferrín ou Xosé Luís Axeitos.

AGABO pola súa parte asume a coordinación do proxecto en Galiza.

AGABO renova a súa Xunta directiva e reafirma a súa solidaridade internacionalista coa revolución bolivariana

por

ESTE SÁBADO 14 DE DECEMBRO A ASOCIACIÓN AGABO CELEBROU A SÚA ASEMBLEA XERAL, ONDE RENOVOU A SÚA XUNTA DIRECTIVA E ANALIZOU A SITUACIÓN ACTUAL EN VENEZUELA, E AMOSA O SEU APOIO AOS AVANCES DA REVOLUCIÓN BOLIVARIANA E AO PRESIDENTE ELECTO NICOLAS MADURO MOROS

Neste sábado 14 de decembro de 2024, a Asociación Galego Bolivariana Hugo Chávez (AGABO) celebrou a súa asemblea xeral onde analizou a situación actual en Venezuela e renovou a súa Xunta Directiva. A nova directiva está composta por Ana Mosquera Fernández que é reelixida como Presidenta da entidade; tamén continúan na equipa directiva Nuria Andión e Adrián Bravo. Incorpóranse a nova directiva Martín Coego e Óscar Lomba.  

A asemblea de AGABO analiza que a os avances da Revolución Bolivariana teñen avanzado considerablemente nos últimos anos a pesar dos ataques e os intentos de desestabilización por parte do imperialismo americano e na guerra híbrida que sofre o país.

Así mesmo, AGABO valora moi positivamente a relacións cos BRIICS e as medidas económicas realizadas polo Goberno venezolano, que conseguiron que a inflación teña uns parámetros non so razoables, senón case normais. A moeda nacional, o bolívar, vai recuperando a súa presenza nas operacións comerciais. E desapareceu o desabastecemento, pois hoxe mais do 90% dos produtos á venda nos supermercados venezolanos son producidos no país.

Ana Mosquera, presidenta de AGABO, analizou que “hai moito que aprender dun Estado que mudou as regras de xogo de Occidente. É preciso que axudemos a que se entenda que non se debe medir América Latina en xeral -e Venezuela en particular- con parámetros europeos. Comprender a Revolución Bolivariana pode axudarnos a ver a  nosa propia realidade desde outro punto de vista: saber que cada pobo ten que escribir o seu presente tendo en conta a súa historia e a súa cultura, entendida esta última como forma de afrontar a vida.”

AGABO participou como observador internacional nas eleccións deste 2024 en Venezuela, “e tivemos ocasión de ver de cerca como se desenvolveron tranquila e pacificamente.”

En verbas de Ana Mosquera, apuntou que: “Pero tamén vivimos agresións violentas ao día seguinte das eleccións. As casas dos chavistas foran marcadas nos días anteriores. Trinta persoas morreron durante eses incidentes provocados polos chamados “comanditos” de Maria Corina Machado e Edmundo González. Dúas mulleres lideres chavistas das súas comunidades, resultaron asasinadas a tiros. Ese mesmo día, en Caracas, varias lideres chavistas do Barrio de Catia foron  sitiadas nun ambulatorio que foi incendiado.”

Actualmente está colgada nas redes unha paxina web, “yacasivenezuela”, onde se esta a realizar unha sorte de crownfonding para asasinar a Maduro. O promotor público desta iniciativa, Erick Prince, é o fundador do exercito mercenario estadounidense “Academy” (anteriormente coñecida como Blackwater) .

Estes feitos, xunto co non recoñecemento  por EEUU e outros gobernos fascistas de Nicolás Maduro como presidente, ademais da situación internacional, levaron ao Goberno de Venezuela a convocar o primeiro “Congreso Mundial contra o Fascismo, Neofascismo e expresións similares”, no que se aprobou por aclamación, o do 11 de setembro deste ano, a creación dunha Internacional Antifascista.

AGABO participa activamente neste proxecto desde o primeiro momento. Sendo promotores do Capitulo da Galiza (que será presentado á prensa o próximo martes, 17 de decembro, en Compostela na Libraría Couceiro ás 11h) no cal xa se sumaron numerosas entidades e varios centos de persoas.  

Na clausura da Asemblea participou Martín Pachecho Morrillo, Cónsul Xeral da República Bolivariana de Venezuela en Vigo onde trasladou un saúdo a todas as persoas socias e trasladou a benvida á nova directiva da Asociación Galego Bolivariana-Hugo Chávez (AGABO). Amosando todo o apoio do equipo consular para as actividades que se realicen proximamente. Así mesmo tamén participou na Asemblea Xeral, Farruco Sesto, exministro de Cultura e Vivenda en diferentes gobernos do Presidente Hugo Chávez Frias.

[Ao Club Faro de Vigo] Por xustiza: coas vítimas das guarimbas

por

O Club Faro de Vigo, financiado polo Concello de Vigo e a Deputación de Pontevedra, trae de visita ao dirixente de extrema dereita venezolano Leopoldo López.

Preséntano coma un heroe e dolosamente ocultan os mortos e feridos que se produciron nos enfrontamentos moi violentos (coñecidos en Venezuela como guarimbas) promovidos por este personaxe e executados polos seus partidarios. Foi unha onda de violencia que só nuns meses deixou 43 venezolanos mortos e máis de 800 feridos, resultado da frustración da dereita ao ter sido derrotada polo chavismo pola vía electoral.

Os seus seguidores sinalaban perigosamente nas redes sociais a persoas acusadas de ser chavistas con fotos e datos persoais, converténdoos en dianas. No punto álxido da súa violencia, queimaron vivo a un repartidor negro que estaba de paso por ser sospeitoso de chavista.

López Mendoza foi condenado, polos delitos de instigación pública, danos á propiedade, incendio e asociación para delinquir, a 13 anos de prisión. Finalmente cumpriu menos de tres, acabando por fuxir ao arresto domiciliario e sendo acollido no Estado Español, polo que é un prófugo da xustiza venezolana.

De quen ven sendo Leopoldo López Mendoza?

O seu pai na actualidade é eurodeputado, ao que o PP concedeu a “nacionalidade express” para que defendese ao seu fillo no Parlamento Europeo.

A nai descende dunha das familias, máis ricas de Caracas que forman parte dunha elite coñecida como “Los amos del Valle”. Durante o século XX, os Mendoza amasaron unha inmensa fortuna da man dos gobernos corruptos de Venezuela.
Forman parte dunha clase social de comisionistas, que parasitou durante case un século o estado venezolano acumulando riquezas persoais e condenando a boa parte da poboación á fame, á miseria e ao analfabetismo. Non é de estrañar que estas familias non acepten o chavismo, afeitos como están a conseguir dos sucesivos gobernos o mellor para os seus petos.

O único compromiso de Leopoldo López é con esa forma de vida, chea de privilexios. De feito, na actualidade está a residir no barrio de Salamanca en Madrid, nunha vivenda que ten un prezo de alugueiro de 10.000€ mensuais.
A estas xentes sempre lles sobraron as clases humildes que mantiñan lonxe das súas urbanizacións.

Rexeitamos a promoción propagandística e falseada do ultradereitista Leopoldo López. Reivindicamos as vítimas dos seus actos. Estamos coas persoas que nestes últimos 23 anos, en Venezuela, accederon á escola, á vivenda e á sanidade, con aqueles que puideron dignificar a súa vida.

Subscriben o texto as seguintes organizacións galegas:

Agrupación Xosé Velo
Asemblea Republicana de Vigo
Asociación Galego Cubana Francisco Villamil
Confederación Intersindical Galega
Confederación Unitaria de Traballadoras
Esquerda Unida
Frente Popular Galega
Mar de Lumes
Movemento Arredista
Partido Comunista de Galicia
Partido Comunista do Povo Galego
Partido Comunista pola Republica Galega
Podemos Galicia

Liberdade para Alex Saab, preso político nos EEUU

por

O país que rexenta a prisión ilegal de Guantánamo vai xulgar a partir do día 12 de decembro de 2022 o diplomático venezolano Alex Saab. O seu delito: xestionar a compra de alimentos, medicamentos e bens básicos para o pobo de Venezuela durante a crise de abastecemento sufrida a causa do bloqueo económico imposto polos Estados Unidos.

Un decreto do Tesouro dos Estados Unidos estase aplicando en todo o mundo de forma totalmente irregular, pois ese organismo non debería ter xurisdición fóra das fronteiras dese país. Ocorre que ao facerse as transaccións internacionais en dólares, poden resultar castigadas aquelas persoas, empresas ou estados que realicen intercambios económicos en dólares con Venezuela.

Neste contexto, Alex Saab foi nomeado en abril de 2018 diplomatico coa categoría de Enviado Especial do Goberno de Venezuela para xestionar a compra de subministros básicos.

O 12 de xuño de 2020 Alex Saab realiza unha viaxe internacional co encargo do Goberno venezolano para a compra de bens de primeira necesidade. O avión de Alex Saab fai escala en Cabo Verde para repostar, onde é detido a petición de EEUU sen ningunha orde de arresto internacional nese momento. A súa detención polo tanto é absolutamente ilegal, ao non existir no momento da súa detención en Cabo Verde ningún fundamento legal que a xustifique.

Durante a súa detención sufre torturas por parte de varios axentes da CIA, que lle negaron auga e atención médica. Despois foi trasladado aos EEUU.

A apertura do procedemento penal aberto nos EEUU vulnera o artigo 14b) da Convención de Viena sobre Relacións Diplomáticas de 1961, ao non respectar a inmunidade diplomática.

Pero sobre todo, o proceso penal aberto en EEUU contra Alex Saab é unha resposta á frustración ao ver que o Goberno de Venezuela era capaz de romper o bloqueo contra a vontade imperialista.

Por todo isto, esiximos ao Goberno dos EEUU a liberación de Alex Saab, porque este proceso non só viola a Convención de Viena de 1961 senon que tamén pretende impoñer a lei do imperio en todo o mundo.

Subscriben o comunicado as seguintes organizacións galegas:

AGABO (Asociación Galego Bolivariana Hugo Chávez), Agrupación Xosé Velo, Anova – Irmandade Nacionalista, Asociación de Amizade Galego-Cubana Francisco Villamil, BNG (Bloque Nacionalista Galego), CIG (Confederación Intersindical Galega), CUT (Central Unitaria de Traballadoras/es), Esculca – Observatorio de Defensa dos Dereitos e Liberdades, EU (Esquerda Unida), FPG (Frente Popular Galega), Fundación Galiza Sempre, Galiza Nova, Isca!, Mar de Lumes – Comité Galego de Solidariedade Internacionalista, Movimento Arredista, PCG (Partido Comunista de Galicia), PCPG (Partido Comunista do Pobo Galego), Podemos Galicia, UMG (Unión da Mocidade Galega), UPG, Xuventude Comunista.

AGABO condena a colaboración do Goberno español na fuga do delincuente Leopoldo López

por

A colaboración prestada desde a embaixada de España en Caracas a Leopoldo López, para libralo da rendición de contas perante a Administración de Xustiza da República Bolivariana de Venezuela, é unha aldraxe dos principios da política democrática e do dereito internacional que implica ao goberno de Madrid. A fuga de López, reo do frustrado golpe de estado de abril de 2019, da Operación Gedeón, de agosto seguinte, e de ser responsábel da morte e lesións de centos de persoas nos anos 2014 e 2018, contou coa axuda necesaria do embaixador español.

A Asociacion Galego Bolivariana Hugo Chávez non pode senón expresar a súa condena polo malbarate que o gabinete de Madrid fai dun acordo de relacións diplomáticas plenas coa querida República Bolivariana de Venezuela. Este feito delitivo require ser xulgado politicamente nunha circunstancia na que o goberno de Caracas, bloqueado e calumniado pola presidencia de Washington, recibe da dirección de política exterior da UE, da que é responsábel o socialista Josep Borrel Fontelles, infundios e desconfianza fronte ás vindeiras eleccións lexislativas de Venezuela.
A vista da colaboración prestada pola embaixada de España ao delincuente Leopoldo López, podemos concluír que tanto o goberno de Sánchez coma a UE corroboran a política terrorista de Trump e desprezan os esforzos do pobo e o goberno de Venezuela por conseguir unha consulta electoral con plena participación e garantías.

Invitamos a política, o sindicalismo e a cultura de Galiza a sumárense a esta protesta necesaria.


RESPECTEN VENEZUELA!

FÓRA IMPERIALISMO!

VIVA CHÁVEZ!

VIVA MADURO!

AGABO denuncia a decisión do Parlamento Europeo de aumentar o bloqueo contra Venezuela e roubar o seu patrimonio público

por

AGABO denuncia a decisión do Parlamento Europeo de aumentar o bloqueo contra Venezuela e roubar o seu patrimonio público
O Parlamento Europeo ven de aprobar un incremento das medidas ilegais de coacción que impiden ao pobo soberano de Venezuela dispór de alimentos, medicinas e outros bens esenciais. A ignominiosa decisión da cámara da UE, que se acomoda aos intereses da presidencia dos EUA, está identificada coas siglas 2019/295 (RSP) e foi votada 10/07/2020.

A Asociación Galego-Bolivariana Hugo Chávez chama a atención sobre a ilegalidade esencial deste cruel dictado do Parlamento Europeo que, a instancias do goberno de Trump, lexitima o bloqueo económico, financeiro e comercial de Venezuela a medio da aplicación ilegal das mal chamadas sancións; xustifica o saqueo de activos que son propiedade da República Bolivariana de Venezuela, e en concreto serve de cobertura para a apropiación indebida por parte de Inglaterra de 31 toneladas de ouro das reservas do Estado de Venezuela e bloquea a transferencia deses fondos ao Programa de Naciones Unidas para o Desenvolvemento para atender a pandemia do Covid-19, como solicitara o goberno democrático de Venezuela.

A insólita e inmoral decisión do Parlamento Europeo abre novas portas para a retención ou transferencia ilegal de recursos e activos, propiedade da Nación venezolana, para llos desviar a gobernos e cúmplices políticos da extrema dereita latinoamericana, so capa dunha presunta atención a migrantes que nunca se deu materializado.

Como ten advertido a Asemblea Nacional Constituinte, Venezuela é o único pais de Latinoamérica que está a vivir o retorno masivo de migrados, a Colombia, Brasil, Ecuador, Peru, Bolivia e Chile, de connacionais queabandonaran a terra a causa do deterioro das condicións de vida. Inducido polo bloqueo e as ilegais sancións externas. De certo, o trato inhumano, xenofobia e discriminación que estes migrantes reciben de gobernos aliados do imperialismo acaba sendo un fabuloso negocio criminal, arestorarespaldado polos euro-parlamentarios.
A opinión da UE debe saber que a Fiscalía de Colombia ten aberta unha investigación con data 19/06/2019 ao valedor dos intereses de Washington Juan Guaidó, por presunta corrupción no uso de recursos da ComunidadeInternacional que estaban dirixigos a axuda humanitaria; os seus antigos partidarios presentaron outra semellante na Asemblea Nacional de Venezuela por transferencia ilegal de activos das empresas filiais de Petróleos de Venezuela: Citgo ( Estados Unidos) e Monomeros (Colombia).

Coa súa resolución, o Parlamento Europeo non fai senón esbanzar a vía pacífica, democrática e electoral trazada pola Mesa de Diálogo
Nacional que acadou o consenso de 105 organizacións políticas nacionais para designar novas autoridades do Consello Nacional Electoral, o pasado 12/06/2020, e estabelecer a data 06/12/2020 para as eleccións parlamentaria previstas na Constitución.

O Parlamento Europea avalia o linchamento moral e a censura dos deputados e lexisladores venezolanos (do actual goberno e da oposición)
cun desprezo do voto popular que lles dera a acta pública que invalida o espazo natural do debate político. Deste xeito, os parlamentarios europeos renegan da súa propia razón de ser e aldraxan un principio fundamental da Democracia.


O Parlamento Europeo desconsidera os sobresaíntes resultados do goberno do Presidente Nicolas Maduro no tratamento da pandemia do Covid-19,que converten á Venezuela bloqueada no pais cos máis baixos indicativos de letalidade da súa rexión natural. Estes resultados foron recoñecidos polas Nacións Unidas.

AGABO ratifica o seu compromiso coas institucións da República Bolivariana de Venezuela, respaldadas polo voto popular e soberano,
co seu Presidente Nicolas Maduro Moros e co proxecto político bolivariano, humanista, socialista e Chavista, do que se dotou o
heroico pobo de Venezuela en 23 procesos electorales lexítimos.

AGABO entende que ao cercar, bloquear e roubar o patrimonio público da República Bolivariana de Venezuela, o Parlamento Europeo deita a defensa da democracia e os seus propósitos de solidariedade internacional aos pés do imperialismo. A recomendación de AGABO para os parlamentarios europeos é que xulguen as consecuencias da política de derrama incesante dos sistemas sanitários públicos da Unión e que os comparen cos resultados do sistema integral de atención de Venezuela que garante consulta, probas clinicas, hospitalización e tratamento gratuíto.

Respecto para Venezuela!

Viva Maduro!

Viva Chávez!

Viva a Revolución Bolivariana!

Galiza, 14.07.20

Xustiza para Venezuela e procesamento de Juan Guaidó

por

Vixente o prolongado bloqueo sobre os recursos da nación e a vida diaria de Venezuela, e mentres o Parlamento Europeo prepara un novo veto hipócrita contra o presidente Maduro, a prensa dos Estado Unidos cualifica de fracaso moral e político a chantaxe utilizada por Trump en todas as frontes do departamento de Estado dos Estado Unidos e particularmente no seu asañamento contra o goberno de Caracas e o pobo da República Bolivariana de Venezuela.

Fracaso das criminais guarimbas mercenarias que buscaban derrocar por asalto o sistema democrático instaurado por Hugo Chávez e revalidado nas urnas por Nicolás Maduro; fracaso da ofensiva militar contra a fronteira de Cúcuta, disfrazada de comando benéfico; fracaso do golpe de Estado de 21 de xaneiro de 2019, que acabou cos seus promotores en fuga mentres o departamento de Estado en Washington cantaba vitoria antes de tempo.

Completo chasco do intento de cambiar ao presidente elixido por un aventureiro da extrema dereita, nunca referendado polas urnas, que na volta de defender durante 360 dias a sabotaxe e o roubo dos bens do Estado de parte do goberno dos Estados Unidos contra o seu propio país, non deu conseguido máis que o desprezo do pobo de Venezuela e nin sequera os votos necesarios dos seus presuntos correlixionarios da dereita para presidir a Asemblea.

Guaidó ten o voto de Trump e a amizade da banda dos Rastrojos, narcotraficantes que sentencian os seus competidores ao forno crematorio; os avais do presidente espantallo, non ignoran que fixo desaparecer cantidades maiores dos fondos asignados ao seu criminal empeño.

Namentres, o Parlamento Europeo aprobou día 20 unha resolución de apoio ao mercenario Guaidó na súa reivindicación da presidencia da Asemblea Nacional de Venezuela o que dá ocasión para Josep Borrell, responsábel da diplomacia da UE defender sancións individualizadas contra Venezuela. Borrell dí que está preocupado pola situación humanitaria de Venezuela, sen citar ao causante do crime.

Dende a Asociación de Amizade Galego-Bolivariana Hugo Chávez (AGABO) reclamamos das forzas políticas representadas no Parlamento Europeo e do goberno do Estado, un trato digno para o Goberno Democrático de Venezuela e a demanda de procesar ao pretendente Juan Guaidó, financiado polo goberno dos Estados Unidos e reo de latrocinio e crimes contra o Pobo de Venezuela. Respecto para Venezuela! Viva Maduro! Viva Chávez! Viva a Revolución Bolivariana!

Combatamos as mentiras belicistas que o Goberno de Colombia inventa contra Venezuela

por

Ante a campaña de mentiras, odio e ameazas armadas contra Venezuela de parte do actual goberno de Colombia, e o discurso belicista de Iván Duque, primeiro militante da sumisión do continente Sur aos intereses imperialistas, a Asociación de Amizade Galego-Bolivariana Hugo Chávez (AGABO) reclama a atención solidaria das forzas democráticas galegas para denunciar as falsedades argüidas polo actual goberno de Bogotá en busca dunha causa de guerra. Duque quer levar toda América a unha situación bélica co obxectivo de traspasar a intereses imperialistas os recursos do continente e lograr o embargo dos dereitos nacionais e democráticos que resisten efectivamente o saqueo.

AGABO invita a todas as persoas e organizacións políticas e sindicais de Galiza a erguer a protesta contra a conspiración pro-imperialista do actual goberno de Bogotá e defender públicamente a Venezuela, directamente ameazada, e a Latinoamérica, desesperadamente cobizada polo imperialismo nunha carreira belicista que ten como fin reparar a ruina histórica da súa economia fundada sobre a mentira, a predación, o bloqueo e a intervención armada.

AGABO, implicada na defensa democrática de Venezuela dende 2012, promete publicidade efectiva para todas as mostras de solidariedade recibidas a traveso do enderezo agabo.hcm@gmail.com

Galiza, 12 de setembro de 2019